नक्कली नोटसहित रंगेलीबाट एक महिला पक्राउ

पाथीभरा डेस्क
शुक्रबार बैशाख २८, २०८१ १९:३५:००

^{झापा ।

प्रहरीले नक्कली नोटसहित मोरङको रंगेली नगरपालिका–९ दोहमनाबाट एक महिलालाई पक्राउ गरेको छ ।}

^{प्रहरीले सुनवर्षी नगरपालिका–५ टकुवाकी ४० वर्षीया कुरेसा खातुनलाई पक्राउ गरेको हो ।}

^{खातुनको साथबाट नेपाली ५०० दरका १८ वटा नक्कली नोट बरामद भएको छ । उनीसँगै रहेका अन्य २ जना पुरुष भने फरार भएका छन् ।}

^{प्रहरीका अनुसार खातुनसहित पहिचान नखुलेका २ जना पुरुष बोका किन्न भनेर बिहीबार दोहमना बजारमा आएका थिए । खातुन र मोटरसाइकलमा रहेका २ जना पुरुषले १२ हजारमा २ वटा बोका किने ।}

^{उनीहरूले १ हजार दरका ३ वटा र ५०० दरका १८ वटा नोट दिएका थिए । बिक्री गर्नेले नोट नक्कली रहेको शंका गरेपछि मोटरसाइकलमा रहेका दुई जना पुरुष भागे ।}

^{बोका लिएरै मोटरसाइकलमा २ जना पुरुष फरार भए पनि उनीहरूसँगै रहेकी खातुनलाई प्रहरीले पक्राउ गरेको हो ।}

^{मोरङ प्रहरीका प्रवक्ता डीएसपी ज्ञानेन्द्रबहादुर बस्नेतका अनुसार परीक्षण गराउँदा फेला परेका ५०० दरका नोटहरू नक्कली रहेको र सबै नोटमा एउटै नम्बर उल्लेख छ । १ हजारको तीन वटा नोट भने सक्कली रहेको प्रहरीले बताएको छ ।}